Աշունը մեր բակում
Երևանյան բակում դեռ աշունը իր դերի մեջ կարծես թե չի մտել, միայն անհնազանդ, սառը քամին է, որ կարծես լուր է բերում աշնան մոտալուտ լինելու մասին։ Բոլորս բակում սպասում ենք մեր կախարդական և ոսկեզօծ աշնան գույներին, որոնք համառորեն ուշանում են։ Աշնանը չորացած տերևների խաղը սքանչելի է։ Մենք խաղում ենք գույնզգույն տերևներով, և երգում աշնան մասին։ Հեքիաթային եղանակ է լինում, բայց տխրում եմ, երբ թռչունները երամ-երամ հեռանում են։ Աշնան բերքահավաքն եմ սիրում, երբ մեր բակի երեխաներով մրգեր ենք հավաքում։ Աշնանը սիրում եմ Տերյան կարդալ, տաք, անուշահոտ թեյ խմել, և մեր լուսամուտից նայել դեպի բակ։